Itsasoko populazioa erdira jaitsi da 1970etik

Tenperatura globalak gaur egungo erritmoan gora egiten jarraitzen badu, koralezko arrezifeak erabat desagertuko dira 2050. urte inguruan.

Blue Planet Report txostenak, Naturarentzako Mundu Funtsak (WWF) egina, alarma piztu du: azken lau hamarkadetan, habitat ozeanikoetan bizi diren arrainen, narrastien, hegaztien eta ugaztunen populazioa % 50 murriztu da.



Ikerketaren egileek diotenez, gehien kaltetutako espezieak giza dietaren parte dira. Esate baterako, hegalaburra, hegaluzea eta berdela dituzten arrain eskonbridoen familiak % 74 uzkurtu du 1970etik. Errudunak ohiko susmagarriak dira: gehiegizko arrantza, ekosistema ozeanikoen suntsipena eta klima aldaketa.

Marco Lambertini WWF Internacionaleko arduradun nagusiaren hitzetan, "Belaunaldi bakar baten tartean, ugaldu daitezkeen baino azkarrago harrapatu ditugu arrainak". Arrainak elikatzen diren koral, mangladi eta itsas belardietan ere narriadura nabarmena gertatzen da. Adibidez, WWFren beste txosten batek ohartarazi duenez, tenperatura globalak gaur egungo erritmoan gora egiten jarraitzen badu, koralezko arrezifeak erabat desagertuko dira 2050. urte inguruan.